«KazakhExport» ЭСК» АҚ 2022 жылы 2,2 млрд теңге таза пайда алды
2022 жылғы аудиттелген деректерге сәйкес «KazakhExport» экспорттық сақтандыру компаниясы» АҚ 2 млрд 272 млн теңге көлемінде таза пайда алды, бұл 2021 жылғы нәтижеден 13% - ға жоғары.
Табыстың өсуі операциялық қызметтің тиімділігін арттыруға, сондай-ақ елдің экспортқа бағдарланған кәсіпорындарын қаржылық-сақтандыру арқылы шикізаттық емес экспортты дамытуды ынталандыру бойынша жүргізілген жұмысқа байланысты.
Осылайша, бір жыл ішінде компанияның активтері 139,4 млрд теңгеден 149,8 млрд теңгеге дейін ұлғайды, оның ішінде меншікті капиталы 113 млрд теңгені, міндеттемелері – 36,8 млрд теңгені құрады.
Өңдеуші сектордың қазақстандық экспорттаушыларына қолдау көрсету көлемі өткен жылмен салыстырғанда 27% - ға өсті және компания үшін 259,1 млрд теңге (2021 жылы 204,7 млрд теңге) көлемінде рекордтық мәнге жетті.
Ұсынылған экспорт алдындағы және экспорттық-сауда қаржыландыру көлемі - 20 млрд теңге, бұл жоспарлы мәннен 43% - ға жоғары.
2022 жылы 80 экспорттаушыға, оның ішінде 500-ден астам шетелдік импорттаушылармен сауда қатынастарын жолға қойған 21 жаңа экспорттаушыға қолдау көрсетілді.
KazakhExport сақтандыру өтемімен қаржы институттарынан экспортты қолдауға тартылған қосымша қаражат көлемі 166,2 млрд теңгені құрады.
Өткен жылы компания экспорттық кредиттік агенттіктерді, коммерциялық сақтандырушыларды және халықаралық ұйымдарды қоса алғанда, шетелдік серіктестермен өзара іс-қимылды дамытуды және нығайтуды жалғастырды.
Атап айтқанда, Өзбекстанның, Тәжікстанның жүйе құраушы қаржы институттарымен аккредитив шеңберінде қаржыландыруды тарта отырып, Қазақстаннан тауарлар мен көрсетілетін қызметтердің импортына сұранысты ынталандыру туралы, Иранмен кепілдіктер және экспорттық кредиттер мен инвестицияларды сақтандыру саласында, Қырғызстанмен қайта сақтандыру шеңберінде келісімдерге қол қойылды.
Әлемдегі ең ірі қайта сақтандыру компанияларының бірі - Swiss Reinsurance Company және Сауд Арабиясының экспорттық-кредиттік агенттігі ICIEC-пен облигациялық қайта сақтандыру шарттары ұзартылды. Факультативтік қайта сақтандыру шарттары бойынша міндеттемелер ICIEC, MS Amlin Syndicate 2001 және Talbot Syndicate 1183 at Lloyd’s-қа берілді.
2023 жылы KazakhExport өңдеуші сектордың қазақстандық экспорттаушыларын қолдау, заңнамалық жетілдіру жөніндегі салалық шараларды іске асыру және Kazakhexport-ты шикізаттық емес экспортты ілгерілету жөніндегі бірыңғай оператор ретінде ұсыну бойынша негізгі қызметті жалғастырады.
Анықтама:
«KazakhExport» ЭСК» АҚ - «Бәйтерек» ҰБХ» АҚ-тың еншілес компаниясы. Компанияның негізгі міндеті – отандық шикізаттық емес экспорттаушыларына түрлі қаржы құралдары арқылы қолдау көрсету.
