Қазанда ТМД аумағындағы AAOIFI-дің алғашқы өкілдігі ЭКА-ның қатысуымен ашылды
Исламдық қаржы ұйымдары үшін бухгалтерлік есеп пен аудит жөніндегі халықаралық ұйым (AAOIFI) ТМД кеңістігіндегі алғашқы өкілдігінің жұмысын бастағанын жариялады. Өкілдіктің ресми ашылуы Қазан қаласында өтті.
Салтанатты іс-шара аясында серіктестік қаржыландыру құралдарын енгізу бойынша ТМД елдерінің практикалық тәжірибесі ұсынылған мамандандырылған көрме ұйымдастырылды.
Қазақстан атынан іс-шараға «Қазақстанның экспорттық-кредиттік агенттігі» АҚ (ЭКА) қатысты. Саладағы қазіргі жағдай мен даму перспективалары туралы баяндама жасаған — ЭКА-ның Татарстан Республикасындағы өңірлік директоры Ренат Калиев.
Өз сөзінде ол Қазақстан Республикасындағы исламдық қаржының институционалдық экожүйесін қалыптастыруға, «Астана» халықаралық қаржы орталығының рөліне, сондай-ақ исламдық қаржының халықаралық стандарттарын экспортқа бағытталған жобаларға интеграциялау әлеуетіне ерекше назар аударды.
Іс-шараның іскерлік бағдарламасы AAOIFI стандарттарын енгізудің практикалық мәселелері мен серіктестік қаржыландыруды дамытуға арналған дөңгелек үстелмен жалғасты. Ренат Калиев Қазандағы AAOIFI өкілдігі қаржы институттары мен нақты экономика секторы үшін сұранысқа ие құзыреттер мен қолданбалы шешімдерді шоғырландыратын орталыққа айналу әлеуетіне ие екенін атап өтті.
ЭКА өкілдері әдістемелік жұмыс және бірлескен бастамаларды іске асыру бағытында ынтымақтастықты тереңдетуге дайын екенін растады. Агенттіктің бұл іс-шараға қатысуы Қазақстан, Татарстан және халықаралық исламдық қаржы қауымдастығы арасындағы нарықтарда тұрақты қаржыландыру тетіктерін қалыптастыру мен сенімді нығайтудағы стратегиялық рөлін айқындайды.
