Moody’s Қазақстанның Экспорттық-кредиттік агенттігінің рейтингін Baa1 деңгейінде растады
Халықаралық Moody’s Investors Service рейтингтік агенттігі «Қазақстанның Экспорттық кредиттік агенттігі» АҚ-ның (бұдан әрі – Агенттік) қаржылық тұрақтылық рейтингін Baa1 деңгейінде растады. Рейтинг бойынша болжам «тұрақты» күйінде қалды.
Рейтингті растау Агенттіктің тұрақты операциялық көрсеткіштерін және оның жоғары капиталдандырылуын көрсетеді. Сонымен қатар, Moody’s Агенттіктің негізгі компаниясы – «Бәйтерек» ұлттық басқарушы холдингі» АҚ тарапынан көрсетілетін қолдауды жоғары бағалайды. Холдингтің өзі де Baa1 деңгейіндегі «тұрақты» болжамға ие рейтингпен бағаланған.
Атап өту керек, 2025 жылдың бірінші жартыжылдығында Агенттік қолдаған өңдеуші өнеркәсіптегі экспорт көлемі тарихи ең жоғары деңгейге жетіп, өткен жылдың сәйкес кезеңімен салыстырғанда екі еседен астам өсті. Жалпы қолдау көлемі 333,3 млрд теңгені құрады, оның ішінде 43 млрд теңге алдын ала экспорттық және сауда қаржыландыруы арқылы тартылды. Болжам бойынша, 2025 жылдың соңына дейін қолдау көлемі 600 млрд теңгеге жетеді.
Агенттік тұрақты экономикалық өсуді қолдау және мемлекеттік бағдарламаларды іске асыру жөніндегі стратегиялық миссиясын жалғастыра береді. Бұл бағдарламалар экспорт географиясын кеңейтуге және әлемдік нарықтардағы өңделген тауарлар мен қызметтердің үлесін арттыруға бағытталған.
Анықтама үшін:
«Қазақстанның Экспорттық кредиттік агенттігі» АҚ – бұл шикізаттық емес экспортты қолдауды негізгі міндеті етіп алған ұлттық даму институты. ЭКА акцияларының 100%-ы «Бәйтерек» ұлттық басқарушы холдингі» АҚ-ға тиесілі.
